Балалардың құқықтарын қорғау орталығында бала құқықтарын қорғаудың өзекті мәселелерін талқылауға және алдағы ынтымақтастықты дамытуға бағытталған БҰҰ Балалар қорының (ЮНИСЕФ) өкілдерімен жұмыс кездесуі өтті.
Іс-шара барысында ЮНИСЕФ өкілі Азамат Жаманчинов Қазақстан Республикасындағы балалардың құқықтарын іске асыру және қамтамасыз ету туралы баяндама жасап, балалар саясатының заманауи сын-қатерлері мен басым бағыттарына тоқталды. Халықаралық сарапшы Тамах Мерфет пен ЮНИСЕФ кеңесшісі Әйгерім Мұсабалинова бала құқықтарын қорғау саласындағы кәсіби тәжірибелерімен және практикалық әзірлемелерімен бөлісті.
Сондай-ақ, Балалардың құқықтарын қорғау орталығының директоры Орталықтың қызметі, жұмыстың негізгі бағыттары және бала құқықтарын қамтамасыз ету мен қорғау бойынша іске асырылып жатқан шаралар туралы ақпарат берді.
Кездесу қорытындысы бойынша Балалардың құқықтарын қорғау орталығы ЮНИСЕФ-ке сындарлы диалог, сарапшылық қолдау және бала құқықтарын қорғау жүйесін дамытуға қосқан үлесі үшін алғыс білдірді. Тараптар алдағы ынтымақтастық серіктестікті нығайтуға және бала құқықтарын қорғаудың тиімді тетіктерін енгізуге ықпал ететініне сенім білдірді.
